Punugu Pilli: తిరుమలలో అరుదైన పునుగు పిల్లి ప్రత్యక్షం.. ఆసక్తికర విషయాలు

తిరుమల (Tirumala)లో అరుదైన పునుగు పిల్లి (Punugu Pilli) ప్రత్యక్షం అయ్యింది. తిరుమలలోని ఎస్వీ హైస్కూల్ దగ్గర బుధవారం సాయంత్రం పలువురికి ఈ పునుగు పిల్లి కనిపించింది. దీంతో అటవీ శాఖ అధికారులకు సమాచారం అందించడంతో వారు ఈ పునుగు పిల్లిని స్వాధీనం చేసుకున్నారు. తిరుమల శ్రీవారికి అభిషేక సేవకు వినియోగించే సుగంధ ద్రవ్యాలను అందించే జీవి ఈ పునుగుపిల్లి. ఇవి కూడా చాలా అరుదుగా కనిపిస్తుంటాయి. ఈ పునుగు పిల్లులు అంతరించిపోతుడంటంతో.. టీటీడీ ప్రత్యేకంగా పునుగు పిల్లులను తిరుమలలోని గోశాలలో పెంచుతున్న సంగతి తెలిసిందే.అంతేకాదు గతేడాది విజయవాడలో ఈ అరుదైన పునుగుపిల్లి కనిపించింది. ఓ ఇంటి ఆవరణలో కనిపించడంతో జాగ్రత్తగా పట్టుకుని బోనులోపెట్టారు.అటవీశాఖ అధికారులకు సమాచారం అందించారు.. వారు దానిని స్వాధీనం చేసుకున్నారు. ఈ పునుగు పిల్లి విజయవాడ ఎలా వచ్చిందా అని ఆరా తీస్తే.. తిరుమలలోని నిత్యన్నదాన కార్యక్రమం కోసం కూరగాయలు తీసుకెళ్లేందుకు టీటీడీ లారీ విజయవాడ వస్తుందట. ఈ లారీలోనే పునుగుపిల్లి బెజవాడకు చేరి ఉంటుందని అప్పట్లో అనుమానించారు.

అరుదైన జంతవుల్లో పునుగు పిల్లి ఒకటి.. ఈ పిల్లి నుంచి తీసిన తైలాన్ని వెంకటేశ్వర స్వామి అభిషేకం అనంతరం విగ్రహానికి ప్రతి శుక్రవారం పూస్తారని చెబుతారు. వీటిని ప్రత్యేకంగా టీటీడీ పెంచుతోంది. ఈ పునుగు పిల్లి వన్యప్రాణి కాబట్టి.. గోశాలలో బంధించి పెంచడం తప్పని గతంలో అభ్యంతరాలు కూడా వచ్చాయి. 1972 వన్యప్రాణి సంరక్షణ చట్టంలోని క్లాజు ప్రకారం.. కానీ దైవ కార్యక్రమాలకు వన్యప్రాణుల సేవలను వినియోగించుకోవచ్చని ఉంది. ఈ చట్టం ప్రకారమే టీటీడీ పునుగు పిల్లులను పెంచుతోంది.

ఈ పునుగుపిల్లి శరీరం నుంచి తైలం తీయడానికి కొన్ని ఏర్పాట్లు చేస్తారు. పునుగు పిల్లిని ఇనుప జల్లెడలో ఉంచుతారు.. అక్కడ చందనపు కర్రను నిలబెడతారు. ఈ పిల్లికి ప్రతి పది రోజులకు ఒకసారి శరీర గ్రంథుల ద్వారా చెమటను విసర్జిస్తుందట. ఇదంతా పునుగు శరీరంపై కొద్దిగా అట్టలా ఏర్పడుతంది.. ఈ పిల్లి తన శరీరాన్ని ఇనుప జల్లెడలో నిలబెట్టిన చందనపు కర్రకు రుద్దుతుంది. ఆ కర్రకు శరీరంపై చెమట ద్వారా వచ్చినదంతా బంకలా అంటుకుపోతోంది. దానని తీసి ఉపయోగిస్తుంటారు. ఈ పునుగు పిల్లి అంతరించిపోతున్న జీవ జాతుల్లో ఒకటి కావడంతో చాలా అరుదైన జంతువుగా భావిస్తారు. ఈ పునుగు పిల్లిని ఇంగ్లిష్‌లో సివెట్, టాడీ క్యాట్ అని పిలుస్తారు. పునుగుపిల్లి భారత్‌తో పాటూ సింగపూర్‌, మయన్మార్, భూటాన్, శ్రీలంకలలో మాత్రమే ఉంటుందట.
Read Latest Andhra Pradesh News and Telugu News