ആറ്റുകൊഞ്ച് ശുദ്ധജല മല്‍സ്യമാണ്. ഈ ഇനങ്ങളില്‍ കുമരകത്ത് കാഴ്ചക്കാരുടെ താരമാകുന്നത് പെട്ടക്കാലന്‍ (നീലക്കാലന്‍) കൊഞ്ചാണ്. ഇത് പാകം ചെയ്യാന്‍ ഉപയോഗിക്കാറില്ല എങ്കിലും കൊഞ്ചിന് അഴക് നല്‍കുന്നത് ഈ രണ്ട് കാലുകളാണ്.

എങ്കിലും പിടിത്തക്കാരും ഇവയെ വാങ്ങുന്നവരും ഇതിന്റെ കാലുകള്‍ ഒടിഞ്ഞു പോകാതെ ശ്രദ്ധയോടെ സംരക്ഷിക്കും. നീലക്കാലന്‍ കൊഞ്ച് രണ്ട് വര്‍ഷം കൊണ്ട് 800 ഗ്രാം വരെ തൂക്കം വയ്ക്കുന്നവയാണ്. സാധാരണ 400 ഗ്രാം തൂക്കമുള്ളവയാണ് തൊഴിലാളികള്‍ക്കു കിട്ടുന്നത്.

രണ്ട് വര്‍ഷം എത്തുന്നതിന് മുന്‍പു തന്നെ ഇവയെ പിടികൂടുമെന്നതിനാലാണ് പൂര്‍ണ വളര്‍ച്ചയെത്താത്തത്. ആണ്‍ ഇനത്തില്‍പ്പെട്ടവയാണ് നീലക്കാലന്‍. തലയുടെ താഴെയുള്ള ഭാഗത്തു നിന്നു തുടങ്ങുന്ന കാലുകള്‍ക്ക് ശരീരത്തിന്റെ മൂന്നിരട്ടി നീളമുണ്ട്. ഇതോടൊപ്പം ചെറു കാലുകളുമുണ്ട്. വലിയ കാലുകള്‍ ഉപയോഗിച്ചാണു തീറ്റയെടുക്കുന്നത്.

തലയ്ക്കു മുന്‍ഭാഗത്തായി കൊമ്പും ഇരുവശത്തും കണ്ണുകളും ഇതിനോട് ചേര്‍ന്നു ഇളം ചുവപ്പോടു കൂടിയ മീശയുമുണ്ട്. ശരീരത്തെ മാസം പുറംതോടു കൊണ്ടു പൊതിഞ്ഞിരിക്കുന്നു. വിദേശ രാജ്യങ്ങളിലേക്കു കൊഞ്ച് കയറ്റി വിടുന്ന കമ്പനികള്‍ മാത്രമാണ് ഇവയുടെ തലയൊടിച്ചും കാലുകള്‍ കളഞ്ഞും കയറ്റി അയയ്ക്കുന്നത്. പണ്ടുള്ളവര്‍ കാലുകള്‍ ചുട്ട് എടുത്ത് തോട് പൊട്ടിച്ച് അതിനുള്ളിലെ മാംസം ഭക്ഷിക്കുമായിരുന്നു.